معجزات الشهيد أبسخيرون مع الطلبة‏

الاسم | م . إ
تروى لنا معجزة أقامها الله لها على يد الشهيد العظيم أبسخيرون القللينى

أثناء دراستى فى السنة النهائية من الكلية التى كنت ملتحقة بها وكنت من الطلبة المتفوقين الحريصين على مستقبلهم و دراستهم لتحقيق اهدافهم المستقبلية التى تحطمت من بعد ما حدث

إن كان الرب معنا .. فمن علينا ؟
كان فى عندنا مادة سهلة جداً ومحتواها مش كبير لكن كان معروف عن الدكتورة اللى بتدرس المادة دى أنها لازم تنزل 45 % من الدفعة اللى هى بتدرسلهم المادة دى بشرط أن يكون النسبة دى اغلبهم من المسيحيين واللى بيشيلها ما بينجحش فيها غير بعد تلات سنين وينجح بعد كدا ويتخرج
ده إذا اتخرج يعنى لأنى شفت بنفسي نماذج كتير وبنسب كبيرة من الناس اللى شالو المادة دى تلات سنين فعلاً

فى العالم سيكون لكم ضيق .. ولكن ثقوا أنا قد غلبت العالم
المهم امتحنت فى التيرم الاول كل المواد وحليت كويس جداً وظهرت النتيجة ولقيت أن كل المواد عندى تقديراتها بتتراوح ما بين جيد وجيد جداً ولكن الكارثة الكبيرة إنى لقيت نفسي شايلة المادة دى انهارت وتعبت نفسياً جداً
إحساس صعب جداً ان حد يكون ناجح طول حياتو وييجى مرة واحدة يلاقى نفسو مستقبلو ضاع وده طبعاً لأنى فى الليسانس ودى اخر سنة ولو امتحنت المادة دى نتيجتى هتطلع دور سبتمبر وخلصت السنة ونجحت فى كل المواد بتقديرات عالية بس للأسف المادة دى مترفعتش إتضايقت للمرة التانية لأنى كان عندى أمل كبير انها تترفع ونتيجتى تطلع كويسة .. صعب جداً ان اى انسان يبنى آمالو على حاجة مش هتحصل

ادعونى فى وقت الضيق .. أنقذك فتمجدنى
كنت ساعت النتيجة قاعدة فى أوضتى منهارة مبكلمش حد خالص وقعدت أعاتب ربنا وأقوللو يارب دنا مقصرتش وإنت عارف .. أنا يارب مش عارفة أتصرف ازاى .. دنا مليش أب تانى غيرك وفى وسط منا منهارة قريت معجزة عن الشهيد أبسخيرون القللينى ومكتوب ان أبونا بيقول إن أبسخيرون زعلان اوى علشان محدش بيطلب شفاعتو زى بقية القديسين .... بصيت لصورتو الموجودة فى اوضتى وقعدت أعاتبو مش انت عاوز تعمل معجزة ؟ انا محتاجالك ... الدكتورة دى صحيح مضطهدانا لكن إنت اتحملت اضطهادات وعذابات كتيرة أكبر من اى اضطهاد او ضيقة انا بمر بيها

بضيقات كثيرة ينبغى أن ندخل ملكوت السموات
وجه وقت الامتحان وقعدت أذاكر وانا يائسة ومحبطة وكان الشيطان مش سايبنى و بيحاربنى .. وعمال يقوللى إيه فايدة مذاكرتك منتى كدا كدا شايلاها شايلاها بجد كنت تعبانة نفسياً أوى ومكنتش حتى عارفة أنا هدخل لجنة الامتحان وأحل ايه تانى فى الورقة زيادة عن اللى حليتو قبل كدا
صليت لربنا وانا بعيط وعينيا مليانة دموع وبقوللو يارب متسيبنيش وايدك تكون قبل ايدى .. انا صحيح يارب خاطية لكن انت يارب لم تأتى لتدعو ابراراً بل خطاة إلى التوبة ودخلت اللجنة وكان الامتحان سهل اوى بس المشكلة إنى ضعفت ثقتى فى نفسي من التجربة الأولى خلانى مش مركزة
ندهت على ابسخيرون القللينى واتشفعت بمارمينا والبابا كيرلس وحليت فى الورقة كمان حل مختصر مش زى المرة الاولى خالص وبعد مرور شهور
طلعت النتيجة والمفاجأة انى نجحت فى المادة دى من أول مرة مع العلم انى المفروض أنزل فيها تلات مرات وأنجح الرابعة
تفتكرو ده بسبب إيه ؟
بسبب محبة ربنا الكبيرة لأولادو اللى ملهومش غيرو وملهومش فى الدنيا أى شئ غير محبتو الكبيرة اللى بتساندنا وقت آلامنا وتقومنا من ضعفاتنا بشفاعة أحباؤه القديسين .. ده هو أبويا الوحيد اللى بيحمينى لما بلتجئ إليه

وصدقونى ياجماعة جربوا تطلبوا شفاعتو وبجد هتلاقوا اسرع استجابة لصلواتكم

بركة معجزات القديس تكون معانا

شكرا ليك يا مكاريوس علي دخولك وعلي ردك الجميل لي ربنا يباركك ونتمني اننا نشوفك زي زمان ونشوف منك مشاركات جميله

بركة وصلوات الشهيد ابسخيرون تكون معنا امين

اقتباس: المشاركة الأصلية كتبت بواسطة marian2 عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]    بركة وصلوات الشهيد ابسخيرون تكون معنا امين

شكرا ليكي اختي العزيزه marian2 علي دخولك وعلي ردك لي ربنا يباركك ويعوضك كل خير ونتمني اننا دايما نشوفك معانا في المنتدي